顯示包含「希臘天空之城」標籤的文章。顯示所有文章

[希臘‧愛琴海] Meteora*Agios Stefanos

 最後, 我地就來到另一間女修院Agios Stefanos (St. Stephen).
山上最高那間就係啦!!
  這間好像比較細. 行了一會就走了

  由Agios Stefanos望回市區既景色
  咁樣走馬看花其實冇咩意思, 因為講真間間修道院都係差不多的東西(當然唔計Grand Meteora). 都係有d手抄本, 宗教物品展出.
 間間都是有小賣部賺少少外快. 

今日天空之城之旅全部完結,
最後司機車返我地去返火車站.  我地買好了17:36火車票!!

 見有少少時間, 我們走了不遠的supermarket買了少少飲品.

  為了趕上時間去天空之城, 我們今天還未吃午餐呢!!上到車, 已急不及待吃小食.
 
 返到去athens已經是晚上11點, 立即找地方醫肚.  點了沙律及gyros.
後感: 宗教壁畫我亦唔知邊個打邊個.  所以我強烈建議買本叫Meteora Itinerary的書. 任何一間修道院的小賣部都買到.  入面有詳細介紹每間的壁畫/展品內容highlight, 建築方法同埋佢o既歷史淵源. 唔會"哦哦哦"完就水過鴨背.  講起小賣部, 修道院的小賣部好多野都係"山上"exclusive(包括上面所講的書), 莫講話雅典, 甚至kalambaka都冇得賣. 我地就買左少少擺設咁啦!  雖然我冇宗教信仰, 不過響呢度確實感受到宗教的偉大, 每間修道院都唔係話鄉村廟仔的size. 起碼都有成間小學咁大, 就咁起響一舊光禿禿的花崗岩上面. 我根本想像唔到起o既人要流幾多血汗先攪得掂.  如果唔係有一般近乎不能理解的決心, 今日我一定冇得見到呢d咁震憾的奇景

[希臘‧愛琴海] Meteora*Great Meteora

參觀完Varlaam，之後立即上車到天空之城大佬Grand Meteora，佢真係好大間
一間=4間.
開放時間: 9AM-5PM (星期二休息), 寫明要穿裙先入得
 Grand Meteora好有大佬風範，入口處特別大。
Great Meteora多好多壁畫，而且範圍好大幅，其中呢幅係保存得最好。
講左咁耐，都冇講過所有修道院全部都要穿長裙，連褲都唔得，要外加一條紗，就好似呢班女仔咁樣啦!! 而所有修道院係入口位置提供免費紗給遊客的。我去meteora之前仲特別買左條裙，著完唔駛帶返香港洗呢！！
 Grand Meteora除左係一般修院外, 佢仲係半間展覽館。展品好多，包括：手抄本, 宗教物品, 有個canteen變左宗教畫的展覽室, 仲有一個比人睇酒窖及廚房.


 還有一個睇落唔多關事的希臘抗戰展廳添.可能係講緊d納粹如何蹂躪Meteora掛. 可能因為Grand Meteora實際上似博物館多過似道院, 一般修道院的規矩響呢度都冇捉得咁緊.  臨入去教堂前係可以係門點蠟燭，見到呢個畫面, 真係好有感覺, 好靚!!
 參觀時間差唔多到尾聲, 睇睇時間真係唔似留左一個半小時, 真的唔夠呢!!
我同小吉子只係隨意看看行了一圈吧了!!
由Great Meteora望出去, 景色真係一流, 可惜係天氣不好。

 離開了Great Meteora上回的士, 往聖三一途中, 司機見到靚景就停低比我影相
 兩 間monastery: Agios nikolaos & Russanou
  影呢張相，我地兩個係要爬上石先影到，的士司機仲協助我地呢！！



唔係佢介紹，我地都唔知呢個係靚景位。

之後返上的士, 司機就響聖三一(Agia Triada)修道院停低, 我地都準備出發啦....咪住! 司機話唔入得. 喂, 唔係喎, 今日唔係例假喎. 司機話我地唔夠時間去啦. 我地睇下錶.


再望一望間修道院同馬路的距離, 就知的士司機唔係想呃鐘. 因為我覺得聖三一絕對係遠離馬路最遠的一間修道院. 基本上行得到去門口, 就差不多夠時間返轉頭上車. 所以都係影下相就算. 唉, 如果唔係火車遲到...

[希臘‧愛琴海] Meteora*Varlaam


參觀完Russanou，之後就參觀標高600m既Varlaam，我地要開始行百幾級樓梯上呀上!!行上去也有點辛苦，樓梯幾高幾斜，有時行下仲要抖下先再行，不竟＂老＂了。
鐘樓及壁畫全出自16世紀中葉
 其實每一間修道院都有個少少既博物館
展出幾百年前既用品
有些更是雕刻品
 14世紀建築

果度最特別是開放了交收物資的房間，因為修道院位於石山之巔。沿山路運貨真係人都顛，所以佢地用繩綁住吊車，用繩由山下吊上黎
 咁呢間房就有一個好大的木製絞盤控制d繩 
呢架就係吊車

 之後到了隔壁既葡萄酒庫
好巨型既酒筒
雖然已經沒有葡萄酒
不過仍然有著好濃厚既葡萄酒香呢!!

 遠遠見到Great Meteora
 參觀完Varlaam，又要行好多樓梯先落到去啦! 
 ~其實呢度真係好高架~
由 Russanou望Varlaam既景色, 真係好壯觀

[希臘‧愛琴海] Meteora*Russanou

呢排比較忙，所以冇時間update自己個blog，仲有就係要搞4月之旅既問題。真係估唔到自己買好哂日本package/租車/溫泉酒店，諗住開開心心的去放假charge up，點知日本福島縣大地震+世紀大海嘯要取消自己既plan。雖然今次去唔到日本，係新聞上見到日本人一個都沒有搶，沒有自私既行為，真係值得大家敬佩。

因為唔知可唔可以取消，所以我打左兩日去CX+EMAIL+FAX，都沒有回應。最後係打電話接通後一個小時先有CX職員與我對話。CX開頭都話唔可以Refund，只可以reissue package，後來見日本情況嚴重，先批准total refund及取消。職員更形容佢地工作情況就好似銀行擠提，電話不停接，office counter全部都係人，所以完全唔可以spare人手去處理fax及email enquiry. 最後我同小吉子商量過決定改地方旅行relax下。

講完我上星期既非人生活，係時候好好寫埋希臘之旅。吉少之前話寫左段短短Meteora blog，我問左佢幾次，佢又答左我幾次，到今日我先打開睇佢寫好既草稿。

(小吉子編寫) 過左一陣, 我地離遠見到一坐坐高聳的石山, 目標在望真係非常興奮! 而家諗返轉頭, 其實邊有咁易搭錯火車丫, 不過火車都可以遲一個鐘先到真係神奇。
落左火車, 有微微雨, 唔阻行路, 不過影相就差d囉. 韓國朋友仔問我地知唔知道旅客中心位置, 我地立刻幫手搵旅行書, 點知都冇寫. 咁我地就分道揚鑣, 佢自己去搵了, 有緣再見喇哥哥仔!

火車站有幾架的士等緊客. 有班人早過我地落車已同司機講緊價, 最後好似聽到佢地75歐羅成交, 不過唔肯定, 因為我地都要同一位鼻哥流緊血的的士哥哥打交道...佢鼻頭有粒暗瘡穿左...的士哥哥一開價EUR$85, 咁我地循例都講下價啦, 其實我地已經遲左好多先到Kalabaka, 同埋吸收左聖島的教訓...差果一百蚊...比佢啦!!
 一路無話...都幾好, 我唔係好鍾意d司機撩人講野. 首先到達的是Agios Nikolaos, 不過今日係佢例假, 冇開門, 所以司機叔叔同我地影張相留念就算了. 只見佢純熟地搵到取景點, 刷一聲, 咁我地就"去"左另一間修道院了.
跟住就到了Russanou, 是兩間女修院的其中一間. 開放時間：0900-1800 (星期三休息)。不過Russanou所在地比較矮，所以行了5分鐘便可以上到去。不過要欣賞其他修道院，例必要行樓梯，還要以百級為計。  因為天雨的關係, 我地都行得比較小心. 其實都唔太濕滑o既. 係我地怕死姐.
Russanou同Agios Nikolaos遙遙相望, 女皇即刻用支炮仔同Agios Nikolaos影返幾張相補數咁話!

 Agios Nikolaos近景
 Agios Nikolaos遠景
由Russanou抬高頭一看就可以低炒其他幾間修道院, 十分有氣勢。所以Russanou被譽為最優美的修道院。入內參觀每間修道院都要比＄，EUR$2/ppl。真係好值得睇，好可惜入內參觀係唔可以周圍影相，影得既只有出面門口及觀賞台位置。
 由Russanou看到的Kalabaka市
 仲望到將會參觀既Varlaam
只係第一間修道院, 我已經覺得十分深刻, 的確, 見到呢d大自然奇景包圍, 好易就會覺得有神的存在. 因為真係太特別了, 難以相信係自然生成.

老練o既的士司機同我地安排了一小時參觀, 不過我地驚不夠時間, 45分鐘就上返車了. 少了一小時對我地真係好大影響...呢個一陣再講

[希臘‧愛琴海] 天空之城 Meteora

多得Metro要修理鐵路，搞到我同小吉子昨日雞毛鴨血，由Victoria行去Omonia站，咁大個站都可以closed，真係冇得頂。今日出去玩先得閒影返呢個水牌，其實昨日一直發現唔到呢個牌，只係見到個站門口拉哂閘，問人先知道closed左，真係唔明希臘人點做０野。　

發洩完後，輪到小吉子。不過小吉子用另一個方法發洩，就係幫我完成Meteroa遊記。由呢篇BLOG開始，關於Meteroa既遊歷，就會由小吉子操筆寫，掌聲鼓勵鼓勵 !!

按計劃今天乘長途巴士到梅帝歐拉，所以我們打算坐地鐵到kato patisia站再步行十分鐘到Terminal b。不過女皇提議既然途經拉利薩站，不如碰碰運氣看能否趕上一天只得一班往卡蘭柏卡的火車。因為火車一來較快，亦不用像巴士般要轉車。我雖然心想應不會咁好彩，但試下無妨。

到了拉利薩站，先看了時間表。

發現已過了發車時間（884火車）幾分鐘，我叫著女皇不用再問，但她那會聽?　她見職員就問，殊不知原來停在月台的火車就是我們夢寐以求的夢幻火車!　女皇萬歲!!!

售票員說只有企位，不過不要緊。第一，都開車了仲邊顧得咁多。 第二，我地都知道d人其實可以響d走廊度坐的。嘻嘻！！我地的火車之旅就這樣開始了。（補充：企位原來平好多，每人只是EUR 14.6）
一開車我就入鄉隨俗坐在走廊。

我們有時又起身行幾步，看見有幾個人偷雞入了包廂的空位。過了一陣子車務員就來查車飛， 順帶趕呢d人出黎。這時我地發現了一個亞洲面孔，十分年輕，看來沒有同伴。 心中不禁羨慕又佩服 ( : 唔知羨慕佩服 D咩?! )

經過了幾個站，乘客上上落落，我們面向著的包廂出現了3個空位。我們心中盤算以希臘人的工作風格，應該不會再查...呢樣果樣！正當我地一味得個諗，獨行年輕人已行了入包廂問入面的3人可不可以坐低。

當中有一個識英文的亞叔就熱情地叫那個年輕人和我們入去坐，真好。
夫婦倆繼續發揮多數香港人的被動本色. 說了6-7次謝謝(是真正非常感謝, 要知道預計車程是5小時)便靜靜地坐下來。我當然不排除這5小時內我們會主動與呢位亞叔打牙較過日晨，不過年輕人卻坐下不久便對亞叔自我介紹。

原來他是韓國人。 21歲， 一個人巡迴幾個歐洲國家，他只在希臘逗留4天。千挑萬選之下決定花一半時間在meteora。 

唔...確實是明智。 因為與女皇響往愛琴海不同，我是去過meteora才愛上希臘。

[希臘‧愛琴海] 往Meteora的火車上

點解我咁佩服果位後生仔呢? 其中一個原因係佢d英文真係...但係咁都夠膽週遊列國，好野! 我見佢全程同亞叔吹水， 仲弊過我同賓賓講野，大家自行想像吧!
不過誠意搭夠，反正咁長車程， 唔明講到明啦! 亞叔之所以識英文，原來去左唔知幾多年加拿大，開餐館。老左思鄉病就回希臘，不過佢老婆就唔識英文，有點邪....

佢沿途講呢塊田種的是橄欖，果塊田種的...都係橄欖! 希臘人唔駛食其他野架咩? 下? 間唔中就幾塊棉花田。 可惜天陰， 唔係一定更靚。有時佢又會指住出面，講下打二戰時納粹軍響呢度殺左好多人。又或者，呢度好多納粹軍中伏比人殺哂之類。 老人家，打仗真係佔人生一大部份。

每逢經過車站，下意識就會睇下究竟係咩站，睇下仲有幾多個站要經過。 因為係直通車，所以好多站都唔停，只係放慢了少許。

呢d時候我地就面貼窗咁搵車站名牌。我冇作大， 好多車站名牌都比d樹呀草呀遮住，係搵一輪先見到架呀! 見到喇! 咦? 喂! 冇英文架? 拎住本書逐隻希臘字母對? scanner都冇咁快啦! 就係咁樣經過幾個站都係咁，我地放棄，唔理自己響邊了。

火車由南開往北， 一路行天上面的雲就越厚，人就越黎越擔心。 心知道雨就落硬，不過d雲厚成咁，一陣唔知會唔會傾盆大雨呢?

同希臘叔叔對話之中，佢響trikala落車。佢話tri即係three，呢個我諗好多人都知，kala原來係開心咁解。　Trikala即係3倍開心咁話。 咁我地睇返旅遊書， 原來trikala係尾5個站。　
隨住時間過去，我們對天氣的憂慮開始減少， 唔係因為天氣好左， 係我地開始擔心我地有冇搭錯車。 旅行書話搭5個小時火車就到，望望隻錶，都就快下午一點。 點解叔叔仲唔落車?

我地，包括埋韓國仔，都有少少發茅。 但係我地又冇可能質問希臘叔叔　"喂亞叔，你係唔係老點?"。只有旁敲側擊問佢仲有幾多個站，不過佢只係答"就到架喇"。可能係我地英文唔好，我地問佢唔識聽；又或者係我地唔識聽啦！老實講呢位識英文好人的叔叔係我地唯一希望，因為查飛佬連希臘話都未必講得好，點可以旨意佢?

果位查飛佬，有時會開少少包廂的門，響喉嚨"咕"一堆音節出黎(我估係next station is 乜乜乜之類)。即係呢，有時即使你唔明希臘話，你都知佢d語氣根本係唔願講野果種囉。

聽落好似好衰咁，但係當亞叔同我地say goodbye落車時(當時已經係一點半左右)，我地真係鬆左一口氣。 因為仲有4個站就知有冇搭錯車了!!
訂閱： 文章 (Atom)
Related Posts Plugin for WordPress, Blogger...