清境合歡山🚵自組單車遊 第二回
當晚一行4人, 帶住興奮嘅心情去到機場. 而家出埠踩車變得普遍, 所以就算帶住部單車, 基本上 check-in 程序都係一樣. 其實最好係早兩日通知航空公司你有幾多架單車, 載單車嘅箱有幾大. 但係對上一次我地搭CX去台灣踩, 我地都無咁做到都無問題, 所以都無為意.
去到 counter 報到,地勤哥哥仔一見到我地幾架單車, 就問我地有無事先通知. 我地答無. 地勤哥哥仔好似係新人, 有D手足無措, 咁佢問後面位 sr. 點算... sr. 同佢講左一輪, 同我地講我地D單車撥入 waiting list...下? 咩叫行李嘅 waiting list? 我地當中無人聽過呢樣野...
先岔開一下, 我地事後諗返, 如果換著一個熟手嘅, 可能情況會好D. 因為我地眼見除左我地之外都無人再帶呢D巨型行李, 個貨艙點都應該唔會爆到話要將部份行李歸入 waiting list. 地勤哥哥嘅做法應該係新人按章工作嘅結果.
繼續正題, 我地問 waiting list 即係乜野? 佢話如果個貨艙爆左, 我地D行李就上唔到機.
"下? 咁 worst case 係咪下一班機先送? 但係呢班已經係最後一班, 聽日就打風無得飛架喇喎"
"係, 因為咁樣我地都唔清楚"
"下? 咁我地人到車唔到咁有咩意思呀? 好啦咁, 咁我地幾時會知我地D車上唔上到?" 諗住最多車都無得上, 咁最多取消旅程...
"er...我地都會盡量安排你地D車上機, 所以都要所有人同貨上哂先知." 下?
"咁如果我地D車上唔到, 去又去唔到台灣. 咁你地會同我地keep住到我地返來?" 我地明顯已經作最壞打算
"er. 應該係" 下? 應該? 扣住我地D寶貝車之後會點呀?
"%@#%#$@^Y%#^&^" (呢堆粗口自己行開講嘅)
....果然係「因管理不善而在全球最佳航空公司排名榜由冠軍跌落第三位的國泰航空」
之後我地遲遲都未上機, 響窗邊苦等工作人員推我地D車上機. 有相為証, 唔係我地前世未見過飛機呀 👤
高雄我地來喇!
去到高雄, 我地一機人過埋關, 海關嘅哥哥姐姐就緊隨執野放工行響我地後面了. 見到咁樣我地有點淆: 海關都尚且如此, 其他服務咪...唉, 不出所料, 出到接機大堂, 銀行, 電訊商全部打烊. 響無mobile data嘅情況下, 搭捷運出市區亦唔識搵路去酒店, 無意思. 出面車影都無隻, 好啦. 睇來都係機場過夜架喇. 反正酒店錢有限, 台北機票都可以唔要, 何況係酒店!?
咦, 等等下, 有的士喎! 幸好仲有一位團友身上帶有千幾蚊台幣. 不過因為單車太大, 亦唔係架架的士都上到. 一定要台灣名物: 豐田 Wish 嘅的士, 推低哂後排座位先上到. 仲只能上到一架單車. 下? 咁4架的士, 只有千幾台幣掂唔掂呀? 立即向司機打聽路程遠近, 好彩都應該夠. 可能有司機大佬號召啦, 未幾都陸續來左幾架 wish 的士. 雖然係前後腳出發, 但最後總算全員都能上車到酒店. 至此終於鬆一口氣啦! 我以為...
呢張係我朋友們甫抵酒店所影嘅相, 係嘞, 我地4個人, 為何得3架車呢? 其實係我坐0個架的士迷路. 間酒店係唔錯, 叫做「雲端精緻旅館」. 地點係六合夜市附近, 所以我都唔係好明點解司機會迷路. 當晚去到已經太夜, 加上冇哂台幣, 所以冇出去吃過痛快. 好啦!! 終於4個齊哂啦!! 可以好好訓返一覺, 準備明天砌車.
+ + + + + + + + + + + + +
雲端精緻旅館 THE CLOUD HOTEL
📍800 高雄市新興區民主路18號 No.18, Minzhu Rd.,Xinxing Dist., Kaohsiung City 800, Taiwan
🌎 http://www.cloudhotel.com.tw/Home/Index
+ + + + + + + + + + + + +
