Photo of the Day
今日行程超級豐富. 之前我都有講過唔想搬來搬去, 以Sorrento為住宿及交通中心, prefer選擇坐其他交通工具去Amalfi海岸玩便算 原本冇打算去藍洞, 不過天氣好到不得了, 唔去藍洞有點可惜. 況且入藍洞唔係你想去就可以入, 都要靠天時地理人和. 有時太大風大浪, 小船會唔開. 如果天氣唔好, 冇陽光的話, 入藍洞又未必睇到呵. 所以今次去到藍洞真係好好彩. 雖然去藍洞係要轉幾次車, 較為煩. 不過我覺得去藍洞係一生必去既其中一個地方.
今日六點半起身, 就出門口行去碼頭. 去到碼頭天還未算好光, 而且霧氣比較重. 人也不多.
我去到既時候, 剛好有班0715快船, 但係要於2分鐘內趕到上船位置 售票員話我地應該夠時間. 起初以為個碼頭好近, 諗住行. 點知係要跑超過600米先上到船. 因為上船既地方係碼頭最端既位置, 即係上圖停左Caremar隻船再前面既一個碼頭. 點知去到剛剛見到隻船拉起左個跳板, 我地唯有同隻船say goodbye啦!!
錯過左班船, 又行返去問售票員駛唔駛再買過張飛. 佢話可以照用, 不過就唔可以換慢船那班. 早知當初, 就把心一橫買平飛算啦!! 起碼0745可以上船. 無法子唯有等下一班, 不過就要成0830先有船啦!! 既然有成個鐘, 我地就慢食早餐. 不過一早碼頭附近餐廳只係開左一兩間, 沒有什麼選擇就去左間Cafe飲咖啡.
終於都上左船啦!! 藍洞之旅開始!!
去藍洞可以有兩個方法, 一個係海路, 一個係陸路. 如果從海路的話, 可以係卡普里島碼頭Marina Grande轉船直接去藍洞入口, 再接駁小船入洞. 不過呢個方法就會比較貴, 而且船要等齊人先開.
我就揀左陸路坐巴士去 Capri
→ Anacapri
→ 藍洞口 (Grotta Azzurra), 上到巴士買飛就可以啦!! 巴士飛亦可選擇買一日卷, 時限票及單程票, 時間表可以睇
link. 其實Marina Grande係有直接巴士到Anacapri, 要30分鐘先有一班車, 你亦可以選擇坐纜車去到Capri再轉巴士. 當然買一日乘車卷比較化算, 仲可以包埋纜車架!!
因為遲左成個鐘先去到Marina Grande , 我地落船見到巴士寫住去Capri, 已經第一時間衝左上車. 之後再由Capri轉巴士到Anacapri.
沿著山路上, 看見好靚既Capri
好快我地就去到Anacapri, 就係 Piazza Vittoria 落車. 一落車會見到呢個指示牌, 好清晰顯示去Grotta Azzurra既巴士站, 不過一場來到, 我就選擇行下.
沿著 Via G. Orlandi 行過去, 一路上見到小商店及食店, 而所有建築物都係白色
可能時間早, 大部份小商店都未開門.
Chiesa di S. Sofia 係 Anacapri 的區內教堂, 整座教堂打從14世紀開始,
不斷的擴建改建而成, 有著巴洛克式設計
之後我地再由Anacapri再轉乘巴士到Grotta Azzurra. 呢程巴士車程都比較耐, 而且路窄, 好多時有對頭大車過, 就要互讓. 不經不覺沿著山路前進, 去到Grotta Azzurra.
從山上望落去, 已經見到唔少人係度等入藍洞呢!!
沿樓梯落, 就到了藍洞乘船口.
一艘一艘小船接住上客, 上左客既小船就排住隊等入藍洞
入藍洞要比入場費. 每人一票, 每票 €4. 小船也要付費, 費用係每人€9.
呢個係海中間收費站,
入去藍洞前,
船伕會叫我地盡量訓低, 避免撞頭. 因為藍洞入口真係好細好窄, 每次都係一艘船入. 船伕一個接一個入去, 有時又會等入面既船出左來先入. 不過佢地動作真係好快.
入到去啦!! wow!! 靚到不得了!! 真係好藍, 好似耀眼發光的藍寶石!!
難怪會被譽為『上帝調出來的藍』以及『 世界七大奇景之一』
船伕會係洞入面唱歌, 而且會停留5分鐘左右, 視乎船伕停幾耐.
船伕仲問我地想唔想留耐d, 佢唔問我都想啦!!
船伕係洞內慢遊了兩個圈, 仲有幫我地影相. 我地都停留左10分鐘.
咁當然佢咁識做, 坐完船比小費時, 你都要識做啦!!
上岸後, 我地都比左 €10小費.
玩完藍洞, 我地就搭巴士去Anacapri. Anacapri往碼頭既巴士站內有張大地圗.
地圗上我已經畫好左幾個重要位置, 包括轉車地點.
沿路到碼頭望出去既外岸線好靚. 今日真係好幸運, 去到藍洞之如, 天氣又好.
落巴士既左手面係小石灘
雖然9月尾, 不過天氣好, 好多人係度曨太陽游水,
雖然係岸邊, 估唔到D水咁清咁藍!! 仲見到有人在浮潛
Capri島上巴士好細, 只能載客10人, 近石灘位置就係去Anacapri既巴士站. 如果想由碼頭直接坐去Anacapri, 就唔好學我地一落船衝前去上巴士, 那個巴士站只去Capri.
Capri島除左藍洞, 纜車, 仲有好多好靚既地方. 可以放慢去玩, 玩一整天會比較好.
玩完Capri, 我地之後再坐船玩埋Positano.
