呢排係度忙緊編排9月份既旅行, 都冇咩時間可以寫下blog! 加上天氣熱到一個點, 放完工返屋企都唔想做, 所以遲遲都冇blog post出呢!! 不過我又真係‎潛水‎潛左好耐, 睇返fb, 原來有成2個月呢?! 都係時候寫返篇先, 如果唔係有人以為我失蹤 😶  呢段時間其實我都仲好活躍去唔同地方食野, 而我又真係冇咩心機寫食評.  好啦!! 講返西日本瀨戶內海遊之旅完, 玩完淡路島, 我就去左岡山市玩.  第一個地方我好鍾意就係呢個岡山後樂園.

岡山後樂園興建於約300年前, 係日本具代表性既諸侯庭園, 與金澤市的兼六園、水戶市的偕樂園並稱為日本三大名園.  總面積約13公頃既後樂園, 有能樂舞台、池塘、山、梅林、茶田等, 係日本庭園中罕見, 而且有寬闊草坪樣式既庭院.   一入到去後樂園真係覺得好靚, 好適合慢慢走慢慢逛, 當然唔少得拍照啦!!  特別推薦大家登上唯心山一覽整個園區景色, 行完之後, 又再2孑1整個日本庭園, 欣賞周邊迴遊式庭園多變既景色.   當日我地遇上日本人係呢度影婚紗照, 原來唔少日本新人都會揀係後樂園拍攝婚紗照.

岡山後樂園係利用虹吸現象原理, 係旭川的5公里上游處引水入園, 引進來既河水用於曲水、池塘、瀑布，建造各種水景, 令園中處處有活水又用園路.  水路更將寬闊的草地、水池、假山、茶室連成一體, 成為一個廣闊既林泉回遊式庭園.

位於正門旁的「延養亭」除了能將園內的美景盡收眼底之外, 而園外既岡山城及周邊山群為背景, 影相出來更靚.   除此之外, 後樂園內種植左百餘棵既梅花樹, 剛好我地去既時候, 正係春季, 仲有櫻花、杜鵑花、菖蒲花、蓮花等.  而秋季更有迷人的紅葉呢!! 園內除設有餐廳「四季彩」, 提供採用岡山當地新鮮食材的日本料理, 另有茶屋可體驗品嘗抹茶.


到訪岡山後樂園交通:
JR 岡山站：徒步 25 分鐘
從 JR 岡山站搭乘市內公車: 12 分鐘 前往巴士車站第 1 乘車處, 搭乘前往「藤原團地」的公車. 後樂園就在「後樂園前」公車站的旁邊