離開了沙漠, 坐了7個多小時車, 終於來到呢個最易迷失的古城 - FES.   老城裡有超過九千條的窄街小巷, 你又點會諗到當今最可靠的google map都會失手於這個地方.   FES是摩洛哥四大古城之一, 亦是最老的一個, 被美國旅遊雜誌Traveler評為全球十大浪漫城市之一.  浪唔浪漫就見仁見智啦!! 今次我先唔介紹我入住的Riad, 重點講下FES有咩玩.

為了唔想迷路, 所以我叫了Riad主人幫我安排一個導遊.  找導遊真係好易, 可以隨call隨到, 叫Riad幫你安排就可以.  之前一晚到埗時, 我地食晚餐認識左一對來自北京的夫婦, 大家傾談翌日會去邊度玩的期間, 都有興趣找一個導遊,   所以我地夾好了四個人就找一個導遊玩FES.  導遊費唔貴, 帶兩個人收200mad, 帶四個亦係收200mad.  一般會問你想去那裡玩, 有什麼想睇, 佢就會幫手安排.   而且帶我地的導遊是一位可以說英語的女姓呢!!

第一站: 菲斯阿塔里納學院 Madrasa al-Attarine
位於Medina的香料區的阿塔里納神學院建於1323-1325年, 原來正正就係我地住宿對出, 內部有木材、瓷磚、大理石、石膏等各類建材的完美結合, 而且有精緻的馬賽克圖案與木雕石刻, 係當地典型的宗教建築代表.  我地去的時候剛開門, 一個人都無, 所以我地任影唔嬲.   本來好想去古蘭經學校 (Medersa bou inania), 不過因為修整中, 所以唔去得.


第三站: Cherratine Medersa 神學院
Cherratine Medersa 神學院1670年建立, 風格較為簡樸, 建築型式都係有噴泉池的方形中庭, 教室則環繞在精美雕飾的拱廊中.  我入到Cherratine Medersa 神學院, 見到幾班學生, 有的坐著在畫素描, 有的坐在地上聽老師講解.  這間神學院一般都好少提到.  但內裡亦保存得比較完好.  樓上看到學生們使用的房間, 以及他們祈禱的地方, 值得一遊.


第四站: Zaouia of Moulay Idriss II
見到這度門都覺得好特別, 與一般見到的好唔同.  這是被認為菲斯始創人伊德里斯二世的陵墓, 雖然陵墓有許多入口, 不過又係遊客止步的地方. 我們只可以從門口偷看偷影.  入面有好多美麗的瓷磚, 就同摩洛哥好多地方一樣有美麗的拱門.  出面有好多賣蠟燭的地攤.   聽導遊講唔同顏色既蠟燭有著唔同的祈求.


第五站:皮染廠 Chaouwara Tanneries
好多遊容認為這個地方係造訪菲斯絕對不能錯過的拍攝重點,  因為工作坊與菲斯的歷史一樣悠久, 皮更是外銷歐洲市場的主力來源.  我地先穿過了皮革店, 之後直接上到可以俯瞰染缸的陽台.   不得不說這個皮染廠真係好臭, 幾百個染缸露天擺放.  雖然用的染料都係天然植物, 但是為了加固顏色, 染料裡面會加鴿子屎和石灰, 這就是皮染廠臭氣熏天的原因.  雖然皮革店的人好貼心, 每人送一枝薄荷葉, 比你放在鼻前, 以抵擋臭氣, 但我個人覺得薄荷葉幫唔到幾多.






第六站: Funduq al-Najjariyyin博物館
博物館內有三層樓, 內部以木材裝修整個博物館, 展品從家居用品到那些用於商業用途的亦有.  最上層有個露天coffee shop, 仲可以係到欣賞整個城市的獨特風景.


第七站: 銅鐵工場
之前都有講過導遊可以安排參觀某些手作工場, 來到摩洛哥當然要睇下當地的銅鐵工仗點樣打造咁靚的手工銅器.  原來佢地用一個鎚加一粒釘, 就可以做出唔同的花款.  難怪摩洛哥有咁多咁靚的手工製品啦!! 人地真係好用心一粒粒打造出來.












第九站: 菲斯王宮
菲斯王宮 Dar el Makhzen 位於新城, 佔地 80 公頃, 17 世紀建成.  由菲斯老銅匠手工打造出來的七扇銅雕大門, 幾何線條圖案精雕得金碧輝煌.    不過守衛都幾深嚴, 我地想行去門前影相, 守衛就叫停我地.  當佢地叫另一些遊客的時候, 我又走埋去影左幾張相.  之前聽人講係可以於門前影相, 但唔知點解當日咁嚴, 行埋去影相都被趕.

去完皇宮, 便完結了今日的導覽之旅.  今日去的行程好充實, 導遊唔算多講解, 但想去的地方亦都安排得唔錯.  之前都有問過導遊一般會帶客遊幾耐, 佢就話沒有特別時間限定, 只要客人想去既地方都會盡量安排.  見佢都好識做, 所以我地四個人比左少少Tips導遊.  從皇宮穿過老城門, 又返回舊城區內的一個大廣場, 廣場周邊是老城牆, 摩洛哥政府會定期維修這座老城牆, 難怪會保存得咁完好啦!!  其實我地遊了一整個半日, 要不是請了導遊, 我相信要走全部景點都要花唔少時間.  我地返回舊城區後, 到了色法林廣場(Place Seffarine)食個late lunch.  色法林廣場(Place Seffarine)又名鐵匠廣場, 我地到了一間樓上cafe吃午餐, 望向樓下, 就會看見鐵匠揮汗勞作打做廚房鍋具, 一路食野一路會聽見陣陣敲打聲, 都幾特別.





吃完午餐後, 返回Riad休息一陣.  大約五點多, 我地又出動啦!! 今次係由那對北京夫婦自駕, 順度車埋我地上山睇日落呢!! 如果說走在菲斯古城區內是一個必須的體驗, 那麼從高處眺望這座千年古城的夜景更是另一種享受.  也是來到菲斯旅行絕不能錯過的地方.  拍攝古城美麗夜景. 的地方, 其實係梅里尼德王朝陵墓 Tombeaux des Mérinides.