摩洛哥11天🅼🅾🆁🅾🅲🅲🅾 舍夫沙萬 Chefchaouen 迷人的藍城 - CTM Bus問題

下午5:15:00 Ishiha 4 Comments

今早準時07:00離開Riad, 走到Blue Gate外等Taxi. 清晨之古城異常寧靜, 街上也很少人, 最後上了Taxi (20Dh)往CTM巴士站. 由Fes 到 Chefchaouen係無火車可以直到, 所以最方便就係坐巴士. 雖然有其他巴士可以去到Chefchaouen, 但比較大型及好一點的巴士公司只有CTM和superatour. CTM每日只有4班, 班次唔密, 所以好快full. 唔買定巴士飛我會好唔安心, 所以出發前我到了CTM巴士官網買定. 若果擔心官網買飛問題, 你都可以選擇頭兩日去到當地CTM巴士買飛. 到達CTM巴士站出示訂的飛, 就可以把行李過磅, 使用巴士下面行李倉係要按重量另外收費, 我們兩個行李喼, 一共收5Dh.

係摩洛哥坐長途巴士, 個人認為盡量選擇坐CTM巴士, 因為巴士比較新淨有冷氣, 而且唔會四處兜客. 雖然票價比其他巴士貴, 但絕對係值得的. 整個車程4個鐘, 期間巴士司機會停三個站, 比乘客落車去洗手間或者買野食. 沿途風景唔錯, 好快就已經到左我地的目的地啦!!

落車後, 我就買好後日由Chefchaouen到Rabat的巴士飛, 無法啦!! 又係一日得一班, 時間開早上0700開, 4.5小時可以到達. 不過太早, 我自己想多D時間留係藍城. 所以search下有冇其他巴士公司有提供呢個路線的服務. 好彩比我找到另一間服務同CTM差不多的巴士公司 - Supratours, 都係可以係網上購票.   而我就揀左係Chefchaouen巴士站先買, 點知問職員, 落車位置係無Supratours巴士飛賣, 最後好彩問到當地人去左離巴士站大約5分鐘的上山路, 先見到一間看似 "store"的巴士公司買到Supratours的飛.

由於巴士站係山腳的關係,要到山上的旅館係要再轉乘Taxi, 費用係20Dh.   我地好快就找到今晚入住的酒店 Riad Dar Soufa. 呢間酒店都係好靚, 而且好有特色, 我下一篇再講. Checkin之後, 見天氣咁好, 又未去食Lunch. 於是我地係路邊揀左間小店食個light lunch, 我地每人叫左野飲!! 估唔到我杯牛油果加xx生果汁(唔記得左), 簡直係好飲到極. 而家查返間小店, 原來已經結束營業, 有點可惜呢!!

整個藍城其實好好逛, 小巷之中有好多商店, 而且我個人覺得價錢會比其他大城市如Marrakesh/Fes要平, 所以大家可以用多少少時間慢慢找心頭好.   係街上見到有人做Henna紋身, 我有走去睇. 但其實Henna紋身用的手繪顔料有可能含有高濃度的有毒化學染料, 紋完後可能引致灼傷, 所以我就無去紋. 下一篇再講我係Chefchaouen 舍夫沙萬玩的地方吧.

Relation CHEFCHAOUEN (Supratours) - RABAT VILLE
Départ	Arrivée	Correspondance	Service à bord	Gamme
12h15mn	17h08mn	SOUK EL ARBAA

摩洛哥11天🅼🅾🆁🅾🅲🅲🅾 菲斯｜FES 住宿於藝術品中 Dar Seffarine

下午6:50:00 Ishiha 6 Comments

好耐無update個blog呢!! 我終於可以係假期中寫返篇摩洛哥之旅啦!! 呢間Dar Seffarine係我整個trip第二最期待的住宿, 點解我會咁講? 之前plan行程期間, 我有個小小願望就係入住一間好似藝術館咁既Riad, 於是我做左好多research, 終於比我揀到Dar Seffarine.

Dar Seffarine位於Fes古老medina中心既豪華Riad, 係一間真實地融合了歷史，藝術和奢華既旅館, 其歷史可以追溯到公元9世紀, 我相信好難係有2000年歷史既media城牆內找到. 雖然我唔係一個藝術鑑賞家, 但這間Riad係一間非常值得人去欣賞, 慢慢去細味的建築.

而我今次特別揀去完Sahara Desert之後入住, 當我係古城內找Dar Seffarine, 一開始的確不是一件易事. 它隱藏於古老的城牆Fes之中, 以我所知佢的位置就係菲斯阿塔里納學院 Madrasa al-Attarine附近. 我來來回回好幾次, 也看不到入口處. 然而它正正就隱藏於黑暗的小巷之內. 如非打開門入內, 跟本你無法看見一間會令你注目既藝術品就在你的面前.

我打開門, 先進入一個帶有圍牆的小花園, 那裡就是吃早餐的地方, 之後繼續行前便是一個好靚好大的廚房. 走到這裡, 我們已經聞到一陣陣的薄荷茶的香味, 更有美味的餅乾及工作人員的熱情歡迎. 工作人員帶領我地走進3層樓的大型庭院, 院內覆蓋著歷史悠久的馬賽克, 木雕及石柱. 整間Dar Seffarine只有6間套房. 臥室位於庭院的兩端, 而側邊有一條螺旋樓梯可將客人帶到其他豪華的套房內.

我地先放下行李休息一會, 到庭院欣賞整間大宅. 整間大宅從廢墟中解脫出來, 是經主人Alaa & Kate 3年的艱苦努力而成. Alaa係伊拉克的建築師, Kate係來自挪威的平面設計師. 憑藉他們的努力及技能, 他們創造了一個可以容納來自世界各地的遊客的傑作. 最令人驚訝的是，大多數原始細節, 如瓷磚, 房間和門都保留完整. 之後我地經螺旋樓梯步行到最高那層, 即可抵達屋頂大型休息區, 這個露天的天台, 可以讓你俯瞰整個medina.

入住Dar Seffarine的另一亮點就係晚餐（僅限客人）, 他們供應家庭風格, 每天晚上都是新鮮烹製的. 通常由Kate和Alaa自己烹調, 從傳統摩洛哥菜中轉出一些新菜色，用強勁的伊拉克燉菜或精緻香料的配搭來增加菜單. 我們當晚被安排與另一對中國夫婦同桌, 大家一同吃晚餐. 當晚晚餐有羊肉Tagine, cous cous茄子以及豆菜, 味道唔錯!! 而晚餐只是每人200馬克.

經過兩晚的沙漠之旅後, 當晚一早就休息. 第二天早上, 到了屋頂露台看日出, 整個medina都很寧靜舒服, 還看見不遠的blue gate一大清早已經有人走過呢!! 看完日出後, 我地又再次欣賞整間Riad, 真係好靚的手工馬賽克及木雕. 休息一會後, 我地出去花園吃早餐. 早餐超級豐富, 你可以品嚐各種咖啡，茶，雞蛋，果汁，麵包，pancake及新鮮水果等等!! 最特別係佢地加紅豆炒蛋, 估唔到味道及效果好夾.

能夠慢慢欣賞整間Riad, 以及到天台俯瞰360度的medina, 呢間咁值得住的Dar, 其實一晚房連早餐都係 €180. 睇返影的相, 我到而家都係咁回味那裡的一柱一木的藝術品.