繼續向北上, 先經過Egilsstöðum.  Egilsstöðum係冰島東部第一大城市, 有油站, 超市及商店, 可以作為我地既補給站及休息站.  由Þjóðvegur開車去Egilsstöðum要一個多鐘頭.  落車行下超市Bonus買完晚上既食物後, 又開車走人.  今次行程比較趕, 未能去埋有靚峽灣之名既東面小鎮Seydisfjordur.  其實東面沿路景色怡人, 揸車期間仲見到好靚既冰島馬呢!!  冰島馬比一般馬既體型較細小, 但唔係迷你馬.   冰島馬係嚴禁出入口, 而且只可同類繁殖以維持其優良的純血統.  如果夏天去冰島玩既話, 不妨參加騎馬tour.  今次冇時間, 寄望下次來冰島可以一試騎馬tour.


之前講過冰島有黃金圈(Golden circle), 其實仲有一個叫鑽石圈(Diamond circle)既觀光路線.   鑽石圈以Husavik, Asbyrgi, Dettifoss及Myvatn等幾個地方環繞遊一圈.  Diamond circle好多時玩都會以米湖附近作中心住宿,  而我地今次亦然.  米湖一向係冰島最重要既旅遊區, 除左有美麗的景色之外, 仲保留完整既火山地理景觀, 包括地熱、間歇性噴泉、火山口等. 由Egilsstöðum開車往米湖方向, 揸車也要兩個多小時.  開始駛離冰川地帶, 進入火山地域.   冰島內陸有兩百多個活火山，平均每隔5-6年就有一次火山爆發.  火山爆發後出現既火山岩, 同地球既表面好類似, 曾經有太空人去冰島作訓練.  唔怪之得好多人去完都話自己好似去左月球探索.    於是吉少來個月球漫步失敗版本先!!


首先去今日既第一個景點: 魔鬼瀑布 Dettifoss.  魔鬼瀑布係歐洲最高、最大、最洶湧的瀑布. 瀑布位置於Jökulsárgljúfur國家公園米湖區,  其源流係我地前兩日行過既 Vatnajökull glacier, 坐落於Jökulsá á Fjöllum菲约德勒姆冰河, 拼流入峽谷中.  沿Ring Road 一號公路可以轉入864或862公路到Dettifoss.   我地由東面過來, 就會走864公路,  呢段864公路只限五月尾到十月頭開放.