【ICELAND ☼ 冰與火之旅】冰島西部兒童瀑布 Hraunfossar & Barnafoss Waterfalls, Blönduóskirkja 教堂, 雷克雅維克 Reykjavik

上午12:20:00 Ishiha 4 Comments

Photo of the day

今日係整個行程揸車最多既一天, 總共433km, 成5個鐘車程. 我地會由冰島北面返回首都Reykjavik, 所以今日只安排去一個景點就最理想啦!! 但細估唔到, 呢個唯一景點, 竟然令到我最無助最煩惱.

今日唯一景點就係冰島西部 Hraunfossar & Barnafoss Waterfalls, 之後便返回首都Reykjavik. 離開Akureyri後, 我地開車先到中途休息站Blönduós. 沿途景色由綠油油變成白茫茫一片.

仲係路邊見到鴨仔

中午時份, 天氣更變得惡劣, 路況就一路變差, 而且還遇上下雪呢!!

好彩雪落得唔大, 似飄雪既情況, 都係落左一陣炸.

過左個山谷後, 視野又開始轉佳

我地先到達中途休息站Blönduós, 會見到呢間blönduóskirkja 教堂, 教堂外觀好似火山爆發咁.

教堂就係1號公路上, 隔離有間好大既N1入油站, 所以我地係度加油時停左一陣. 呢度去Hvammstangi海豹小鎮唔太遠, 大概58km. 今日我地要趕路, 所以冇辦法去, 期待下次啦!! 雖然我地冇去西北邊, 不過見到呢個咁可愛既路牌, 當然要停車影下相啦! 通常講Húnaþing vestra 都係指北邊冰島 Hvammstangi一帶.

我一路揸車南下有一個目標, 係要找一個大大既路牌影相. HAHA!! 我終要找到一個啦!! 有齊哂北面第四大城市Akureyi以及首都Reykjavik. 而我身後面有個靚景襯托, 超靚呢!!

突然間一個大好天, 太陽影照到水池泛起了深深既寶藍色, 好靚!!

影完咁靚既景, 開心過後上車繼續向兒童瀑布 Hraunfossar & Barnafoss Waterfalls進發. 點知個GPS竟然帶左我行左條Off Road仲要間河. 原本2小時11分鐘既車程變左成3個半鐘. 如果跟下圖順由1號公路轉入553, 應該冇問題. 最後我係行左橙色條線, 經1號轉入525, 行左好短525就上左山唔知自己去左邊. 呢刻真係好灰呀!!

整段上山路係好窄, 仲有條溪係一邊, 跟本冇得調頭走回頭路.

車行過既地方全部都係凹凸唔平既地面, 係山頭仲見到好多隻傻傻既羊望住我地

(其實我覺得傻既係我地多d囉!!)

望一望個電話, Signal都冇哂!! 心知不妙, 我真係唔想今晚係度訓呀!! GOSH!!! 係好無助既時間只可以繼續見平面就行, 點知行行下見到綠油油既平原啦!! 起碼呢一刻可以放鬆少少, 仲見到好遠有幾間屋呢!!

終於找到落到山既路啦!! 呢個時候就見到條好大既彩虹呢!! 真心覺得有少少lucky, 而且好應景.

難題好似解決左, 點知行車過左幾間小屋之後, GPS又點多個難題比我啦!! 就係要過河. 睇返上面既地圖係有條長長既河與518公路平行一起, 所以GPS咪叫我過河直通往518公路上, 那當然係最短路程. 我有落車望過條河, 但不太知河床有多深, 決定回頭算了. 呢個時侯大家完全冇哂心情去影條河啦!! 之後我返回平路, 諗住放棄呢個行程.

點知行左大約15分鐘見到有橋可以橫過整條河, 心裡邊又再次鬆一口氣, 唔駛諗一枝箭快速開車過河啦!! 好彩呢個世界仲未到絕路. 我地幾經辛苦, 什麼也捱過去. 可以行回正常既518公路, 安全到了兒童瀑布 Hraunfossar & Barnafoss Waterfalls. 見到呢個咁靚既 Hraunfossar & Barnafoss Waterfalls, 大家都好興奮. 雖然落住毛毛細雨, 都唔會影響到我地行瀑布既心情.

熔岩瀑布（Hraunfossar waterfalls）係冰島最大環帶狀分佈既瀑布, 由眾多乳白色的小瀑布形成, 小瀑布經空隙就往下流, 流入奶藍色既冰川河裡.

Hraunfossar & Barnafoss waterfalls係大部分冰島人認為於冰島上最壯麗、最寬廣既瀑布。

睇完瀑布後, 要開快少少返回首都Reykjavik. 返回1號公路上又繼續下大雨, 間有陽光. 冰島天氣無時無刻不停地變. 係環島之旅結束前, 我地見到好靚既耶穌光呢!! 今日既行程有驚無險, 實在好彩!! 為我地於呢個旅程上加添一個特別及難忘, 冰島呢個地方充滿住大自然既力量, 有時人類都未必可以駕馭到.